Dowlada PL oo ku dhawaaqday in cidii qof aan la diwaan galin ka kireeya guri tilaabo adag laga qaadayo

Ciidamada amniga gobolka Bari oo galabtay shirjaraaid ku qabtay xarunta bileyska magaalada Boosaaso ayaa soo saaray sharic cusub oo mamnuucaya in qof aan la garaneyn laga kireeyo guryaha gobolka Bari.

Taliyaha bileyska gobolka Bari Cismaan Xasan Cawke iyo saraakisha gobolka ayaa sheegay in dadka gobolka ay had iyo goor ka kireeyaan guryaha iyo hoteelada magaalada Boosaaso iyo nawaaxiged dad aysan diwaan galin,isla markaana aysan waxba ka aqoon waxa yihiin iyo wax ay u yimaadeen gobolka.

Taliyaha ayaa sidoo kale tilmaamay in dadka guryaha kireysta qaarkood markey kireystaan hadana dajiya dadkale oo aan haba yaraatee la aqoon waxa ay yihiin, ayadoo qaarkood dadkaasi ay qeyb ka yihiin dhibaateynta amniga,sidaas daraadeedna tilaabo adag laga qaadyo dadka Hoteelada iyo guryaha leh hadii dadka ay ka kireeyeen amniga wax u dhimaan.

Taliyaha ayaa ugu danbeyn u baaqay shacabka reer Puntland in ay ka foojignaadaan arimaha ceynkaas oo kale ah, oo ay wada shaqeyn fiican la yeeshaan laamaha amniga si loo hubiyo dadkaas inta aysan geysan fal amniga wax u dhimi kara.

Muxiyadiin Boosaaso

Allidamaale@hotmail.com