|
| ||||||||||
|
|
|
| ||||||||
|
Warbixin hoose oo qarsoon: Xagal daacinta Mr.Omaar iyo Dadaalka kooxaha xag-jirka Diimeed (Al-qaida)>>>>> |
||||||||||
|
Dr: Husein Mohamed Dirir |
||||||||||
Waxaa la yaab,fajaciso,iyo dhabanahays ku noqday qof kasta oo Soomaali ah,lehna damiir wadaninimo,isla markaasna mahadho ku reebay maanka Indheer-garadkii sooyaalka Taariikheed wax-kala socday,sida fudud ee kooxaha xag-jirka Diimeed (Al-qaida) ay isugu soo ururiyeen gudaha Soomaaliya,iyagoo isaga soo gooshay daafaha Caalamka gaar ahaan Dooxada Iswat,Yeman iyo Eriteria si ay gabaad iyo dhufaysba uga dhigtaan dhagar-qabayaal dalalkooda danbiyo ka soo galay oo aan haysan meel ay ku dhuuntaan. Waxaa kale oo aan mugdi ku jirin inuu gaabis yahay doorka abaabul iyo diyaarinta cudud Milatari oo si awoodaysan u caabin karta kooxahan oo ay ku hawlanyihiin masuuliyiinta DFKS ee uu M/weynaha ka yahay Shariif Sh. Ahmed,geeridii Cumar Xaashi Aadan (Wasiirkii Abniga) kadib. Waxaa marag ma doonto ah inuu gacanta Xukuumadda soo galay maal faro badan(Hub,Rasaas,Agab Milatari iyo Dhaqaaleba) ilaa iminkana wax la taaban karo oo dhaafsiisan is-difaac jilicsan oo muuqdaa ma jiro,waxaana hubaal ah haddii sida ugu dhakhsaha badan aan loo agaasimin tayaynta Ciidanka Xoogga Dalka Soomaaliyeed in guud ahaan Ammaanka Gobolka Geeska Africa ay khatari soo wajihi doonto,gaar ahaan dalalka deriska la ah Soomaaliya sida Kenya ,Ethiopia iyo Djibouti oo ay ku taamayaan Al-shabbab iyo Al-qaidaba inay weeraro ku qaadaan. Waxaa haboon in Au iyadoo ka faaiidaysanaysa kulanka Sirte ee Libiya ay Caalamka weydiisato in Soomaaliya loo fududeeyo Qodobadan:- 1- In Ciidanka Amisom awood loo siiyo in ay noqdaan Nabad-dhaliyayaal ,weerar qaadi kara,baacsanna kara kooxaha Dawlad-diidka ah iyo Argagisisada Caalamiga ah ee ku sugan Muqdishu. 2- In Xukuumadda Shariif Sh. Ahmed laga qaado xayiraadda Hubka ee la saaray Somaliya 1992 ee ku xusan Resolution 733. 3-In Caasimadda Soomaaliya si ku meel gaar ah loogu raro goob xasiloon,iyadoo la fulinaayo lana meel-marinaayo Go'aanadii hore uga soo baxay Golaha Ammaanka ee ku talinayay sidaasi. 4- In Gobollada Nabdoon loo soo raro Xafiiska UNPOS,sida ku xusan qaraaradii Golaha Ammaanka ee hore. 5- In la soo dhammaystiro Ciidanka Amisom ee loo qoondeeyay hawl-galka Somaliya si uu u najaxo,miro wax-ku-ool ahna looga gurto Hawlgalkan. 6- In la abuuro Maxkamad Caalami ah oo la hor-keeno denbiilayaasha gayaysiiyay Soomaaliya inay noqoto mid calan Madaw laga taagay,gabaadna looga dhigay Al-Qaida. 7- In awood loo siiyo soo faro-galinta arrimaha Soomaaliya dalalka deriska ah,maadaama ay isku xiran yihiin Amaanka wadamadooda iyo kan Somalia,iyagoon kala sooc lahayn Madaxweyne Sh. Shariif Sh. Ahmed waxaan ku baraarujinaynaa inuu isagoo la kaashanaya Ra'isal-wasaare Sharmaake uu sameeyo isku shaandheyn Xukuumadeed oo deg-deg ah,maadaama ay fadhiid noqdeen Wasaaradahii muhimka ahaa sida Wasaaradda Arrimaha Dibadda,Gudaha iyo Gaashaandhigga,waxaana aan kugula talinaynaa in xilalkaas loo xulo shaqsiyaad aqoon u leh,waxaana habboon in cid kasta loo xulo meesha ay ku habboon tahay,Tusaale Oomaar wuxuu ku fiicanyahay Ganacsiga sidoo kale Gaandi wuxuu ku fiicanyahay Tacliinta sare,C/qaadir Cali Cumarna wuxuu ku fiicanyahay Hawlaha guud iyo Gaadiidka. Waxaa xusid mudan in mudadii yarayd ee Wasiirka Arrimaha Dibadda uu joogay Mudane Oomaar uu u fududeeyay Somali-land inay ka qayb gasho shirar badan oo Igad ay soo agaasintay,isagoo ka gaabsaday inuu ka hor-joogsado ka-qayb-galka kulamadaasi,waxaa kale oo jirta in M/weynaha Somali-land (Riyaale) uu Kuweit tagay isagoo sheeganaya M/weyne dal ka go'ay Somalia inteeda kale,iyadana Wasiirku waxba kama oranin sida laga xaqiijiyay ilo xogogaal ah,tan ugu daran ayaa ah in uu Wasiirku u ololeynayo sidii dhismaha Safaaradda Somalia ee Qadar Somali-land looga siin lahaa qayb ay surato calankeeda,taasina waxay meel ka dhac ku tahay Madaxbanaanidii Somalia,waxaana aan ku adkeynaynaa Safiirka Somaliya u fadhiya Qadar General Naaji in uusan ogolaanin falal noocaas ah fulintooda,maadaama uu yahay General Somaliyeed oo wax badan og.Oomaarna waxaannu kula talinaynaa inuu ka joogsado u adeeggidda Gooni-isu-taagga Soomaali-land,maadaama uu hadda ku magacaaban yahay Wasiirkii Dibadda Somalia.(Hal dhagax laba shinbirood laguma wada dili karo) Ugu danbayntii waxaan Beesha Caalamka u soo jeedinaynaa in aan dhabarka loo jeedin arrimaha Soomaaliya ee ha loo gurmado,waxaana cad in haddii aan laga faa'idaysan fursaddan (Bussiness as usual) in xaalku uu gaari doono meel aan waxba laga qaban karin,Qarankii Soomaaliyeedna uu burburi doono (failed State) khariidaddana laga tirtiri doono. Dr: Husein Mohamed Dirir Mogadishu,Somalia
Allidamaale.com |
||||||||||
|
Thanks For your Visiting |
|
|
||||||||
